DISCALCULIA

A discalculia é un trastorno específico da aprendizaxe ligado a área de matemáticas, caracterízase por unha dificultade na aprendizaxe e manexo da numeración (cifras e números) e para realizar e comprender cálculos matemáticos (operacións aritméticas e resolución de problemas). 

O DSM-V engloba este trastorno dentro do trastorno específico da aprendizaxe e cítao como un termo alternativo utilizado para referirse a un patrón de dificultades que se caracteriza por problemas de procesamento da información numérica, aprendizaxe de operacións aritméticas e cálculo correcto ou fluído. 

Este trastorno pode aparecer asociado a trastornos ou dificultades específicas na lectura e escritura, como a dislexia. A causa é de tipo multifactorial con base neurolóxica.

O neno ou nena con discalculia presentará unha serie de dificultades como: 

• Dificultades na noción de cantidade.
• Dificultades na noción e escritura de números: copia e ditado, escritura incorrecta dos números, confusión entre números cunha forma ou son semellante, inversión numéricas, erros nas seriacións numéricas como repeticións ou omisións de números. 
• Confusión entre os signos numéricos.
• Erros nas operacións aritméticas.
• Dificultades no cálculo mental e nas estimacións.
• Erros no razoamento e na resolución de problemas
• Cústalle entender as figuras xeométricas e captar as estruturas espaciais. 
• Dificultades para realizar abstraccións a partir de material numérico.

A maiores poden aparecer dificultades noutros ámbitos como:

• Dificultades perceptivo-visuais.
• Dificultades na orientación espacial.
• Dificultades na adquisición do esquema corporal, lateralidade.
• Problemas coa orientación espacial.
• Dificultades nos conceptos abstractos como o tempo ou as unidades de medida. 

Exercicios que podemos realizar con este alumando: 

• Exercicios perceptivo-motores que comprendan actividades para o coñecemento do esquema corporal, simetrías, conceptos como arriba/abaixo, diante/detrás, dereita/esquerda, exercicios de orientación espacial, actividades de coordinación viso-motrices...
• Traballar a manipulación como base das matemáticas. 
• Traballar a atención (en especial a atención sostida) e a memoria (memoria de traballo) como funcións básicas. 
• Exercicios específicos de cálculo, centrándonos na noción de cantidade, que engloba asociación número-obxecto, conservación da materia, con cantidades continuas e discontinuas, cálculo escrito e mental, contar, unir, separar, clasificar con obxectos, escritura de números, realización de operación con apoios materiais, etc...
• Exercicios a través das TIC (pizarra dixital, software, apps, actividades LIM...)