POR QUE OS NENOS/AS COMETEN FALTAS DE ORTOGRAFÍA?

A maioría das veces os nenos/as escriben sen fixarse no que están a escribir. A falta de atención á hora de redactar failles cometer graves erros de ortografía.

Outras veces cometen o mesmo erro ortográfico varias veces sen darse conta. Isto é debido a que non memorizan a regra ortográfica adecuadamente porque non se lles ensinaron as estratexias de aprendizaxe para reter e interiorizar o fallo.

Pronunciar mal determinadas palabras ("armario" por " almario") tamén pode ser consecuencia importante de cometer faltas de ortografía. Normalmente escribimos como falamos, e se cadra, o erro está na maneira de pronunciar. Outra causa pola que cada vez máis os nenos/as cometen máis faltas de ortografía é o escaso uso da escritura convencional. Co avance das novas tecnoloxías e os sistemas informáticos, a escritura de cartas e o correo tradicional cada vez son máis inusuais.

O escaso tempo de lectura que lle dedican hoxe en día os nenos/as, tamén vai condicionar en gran medida unha mala ortografía.

Pero... como podemos axudar aos nenos/as a non cometer erros ortográficos?

•          Actitude dende a familia

Debemos mostrarnos acougados ante os fallos ortográficos do neno/a. Moitas veces simplemente mostrámoslle enfado pero non lle ensinamos a solucionar o problema. Non debemos transmitirlle a nosa preocupación excesiva pola ortografía, senón que debemos motivalos a utilizar unha escritura correcta, animándolles a escribir cartas, a participar en concursos literarios, etc. e sendo nós exemplo para o neno dunha boa escritura

•          Respectar a súa maneira de aprender

Observar a súa maneira de memorizar. Se a súa memoria é predominantemente auditiva, aprenderá mellor deletreando as palabras en voz alta; se é visual, necesitará escribilas.

Podemos propoñer actividades como: xogar coas listas de palabras (por exemplo, inventar por quenda unha frase divertida cunha palabra, buscar outras palabras que rimen…). Ou utilizar unha lousa para que o neno xogue a ser o profesor: propoñédelle que sexa el o que dea a clase.

•          Traballar a imaxe visual da palabra, máis que a aprendizaxe de regras

 O fundamental é a adquisición do hábito de escritura correcta, cunha metodoloxía de carácter reiterativo para reforzar a memoria visual. Neste sentido, un dos exercicios máis utilizados é o ditado, cuxo texto debe ser coñecido previamente para que a imaxe e a estrutura das palabras dubidosas sexa gravada con corrección.

•         Exercicios específicos

Os exercicios de creación: narracións, cartas, adiviñas, poemas, trabalinguas, cómics, situacións varias de escritura, con temas atractivos, motivadores, servirán tamén para reflexionar sobre a ortografía,

analizando acertos e erros

•          Uso do dicionario

 O dicionario debe ser unha ferramenta necesaria para comprobar a forma da palabra e relacionar a mesma con outras da súa familia léxica.

•          Xogar para relaxar a presión

Para evitar que a un neno se lle atragante definitivamente a ortografía, convén rebaixar a presión que recibe do profesor, dos pais e, ás veces, de si mesmo. A ortografía pódese converter nun xogo relaxado, desconectado do estudo, que valore ao neno/a e lle devolva a confianza.

Para isto podemos propoñer os seguintes exercicios: Crear frases absurdas co seguinte xogo: o primeiro xogador escribe unha palabra nun papel, logo dóbrao e pásallo ao seguinte, que fai o mesmo. Cada xogador escribe unha palabra por quenda, respectando unha orde (nome, adxectivo, verbo, etc.)

•          Fomentar a lectura

 Xeralmente, os lectores asiduos teñen máis facilidade para a ortografía: como é lóxico, o feito de mergullarse na lectura axuda a que se lles fixen as palabras e crea automatismos. 

E cos que non len, que facemos? Hai que buscar camiños indirectos, que adoitan ser pontes cara á lectura: xogos na internet, revisas infantís,  cómics, lectura no ebook, contos pictografiados, etc.

•          Potenciar o pracer por escribir

Independentemente da idade que teña o neno/a, é importante distinguir a ortografía da expresión escrita, para non frustrar a espontaneidade. Se un neno/a conserva o pracer por escribir, aprenderá a ortografía con maior facilidade. Debemos animalo a crear tarxetas de invitación, o menú de festas, escribir poesías a partir das letras dun nome propio, recetarios, etc.